top of page

Athalia su soño ta aseptashon di hende ku ta biba ku e viro di HIV 

Kuido pa pashèntnan ku HIV aki na Kòrsou ta bon reglá, pero lamentablemente e bèrguensa ta grandi. Ta p’esei ta un reto enorme pa Athalia Alberto, (29) konsulente riba asuntunan di HIV, pa konvensé pashèntnan ku HIV pa tuma remedi. Kuater aña pasá el a kuminsá komo konsulente den hòspital Sint Elisabeth. Di e forma aki el a yena e bashí ku zùster Monica Kappel a bai laga atras despues di su morto den 2015. Awor ta e hóben Athalia akí ta e persona di konfiansa i e punto di kontakto pa mas ku 700 persona infektá ku HIV-1 haña tratamentu na Kòrsou.

Fásil pa trata

“Mi ta bai muri? Mi kabeinan ta bai kai? Hendenan lo por mira ku mi ta malu?” Esakinan ta djis algun di e preguntanan ku Athalia ta haña tur dia pa kontestá. Ora referí pashènt na dje, nan mes apenas a kaba di tende ku nan ta infektá. Athalia den su konsulta ku nan, ta yuda nan ku aseptashon dje malesa kontestando e hopi preguntanan ku nan tin. Awendia infekshon ku e viro di HIV ta fásilmente tratabel. Un píldora pa dia ta sufisiente pa suprimí e viro. Ántes, lo bo a muri, pero awor en prinsipio bo por kumpli 100 aña mes, basta bo sigui tuma tratamentu debidamente. Lamentablemente tòg un parti dje pashèntnan tin problema ku esaki.

Athalia Alberto

Bèrguensa

E bèrguensa di ta infektá ku e viro di HIV ta ankrá hopi profundo. “Dor di e esfera di tabú ku e tópiko ta aden i tambe prehuisio, hopi hende no ta ni presentá na nan sitanan. Nan tin miedu ku hende ta haña sa ku nan tin HIV” kual no ta e kaso, segun Athalia. E tin hopi sita tur dia, mas hende hòmber ku hende muhé. E ta pensa huntu ku nan pa purba yega na solushonnan práktiko pa problema spesífiko ku kada pashènt por ta konfrontá e.h miedu di presentá na konsulta, Tin bia e ta rekerí basta energia pa konvensé un persona pa bin poli. “Aseptashon di HIV aki na Kòrsou ta na un nivel hopi abou. Hopi bia ni ku nan famia nan no ta kompartí e diagnósis”, segun e konsulente di HIV.

Tuma bo salú den bo man

Athalia ta purba konvensé su pashèntnan pa habri nan mes pa ku nan malesa. “Una bes nan papia habrí, nan mes ta ripará ku nan no tin asina tantu rason pa prekupá”. Athalia ta gusta eduká i konvensé hende pa tuma nan salú den nan mes man.


Hopi pashènt no sa bon pakiko nan mester tuma sierto remedi. “Nan ta haña remedi serka dòkter, pero si bo puntra nan dikon, kasi semper nan ta bisa ku nan no tin un idea. Esaki na final di kuenta ta difikultá e proseso, pasobra si nan no sa dikon nan mester tuma un remedi, nan ta stòp despues di un luna,” segun Athalia. E ta spera ku si e splika bon kla pakiko ta asina importante pa un persona uza e remedinan kontra HIV sin falta, ku bèrdaderamente pashèntnan ta kuminsá i sigui tuma e remedinan akí tambe sin faya. Tin bia pashènt ta stòp di uza remedi pasobra nan ta sinti nan mes mihó, òf pasobra nan no a sinti nan mes malu nunka.


Pa hopi pashènt Athalia ta keda nan persona di kontakto pa loke ta trata e malesa. Komo konsulente di kuido, e ta purba mas tantu posibel pa pashènt haña e kuido nesesario. “E úniko motibu pa mi stòp di ta den kontakto ku nan ta ora nan bai biba afó”, asina Athalia ta bisa. Den e último añanan, e tabatin ku tuma despedida di hende ku a fayesé pa motibu di Aids diferente bia. “Esei ta hasimi dolor, pasobra mi sa ku esei no tabata nesesario. Si un hende bebe su remedi tur dia sin falta, e ta mantené su mes salú. Esei ta kompletamente diferente for di haña kanser, kual ta hopi impredisibel. Hopi bia hende no por kere esei. Ora nan puntrami: Ma.. ta ki dia mi ta muri antó? Mi ta kontestá nan: Dia un outo dalbu.”


Mamanan hóben

E kos mas difísil p’e ta ora e hañ’é konfrontá ku mamanan hóben i soltera kual ta pone hopi atenshon na nan yu lagando nan mes afo. Nan ta hóben ainda, i seksualmente aktivo. Ta hopi importante pa konvensé nan pa buska tratamentu médiko. “E kos mas importante pa un yu ta pa su mama keda salú moda ku e mama por sigui kuid’é”, Athalia ta bisa. “Además: un hende bou di tratamentu no por sigui pega otronan ku e viro. Apesar di esei tog tin reto nan ku ta presenta ku ta stroba un mama sigi den tratamentu. E hendenan muhé aki ta trata na djis sobrebibí. Asin’ei, poko tempu pasá un mama a fayesé lagando yu hóben atras. Sumamente tristu pero mas ku tur kos sin nodi.”


Menos tabú, mas práktiko

Tambe ora ta trata di diagnósis, ainda tin hopi espasio pa mehorá. Muhénan ku sali na estado, ta wòrdu kontrolá riba presensia di HIV den sanger, pero por ehèmpel un dama ku hasi aborto nò. Di kon nos no ta kuminsá ofresé tur e damanan akí tambe e mesun HIV tèst ei standart? Mas trempan bo detektá un persona infektá, mas lihé e por kuminsá haña tratamentu. Asina bo por evitá por ehèmpel ku un hende ta haña AIDS. Tambe dor di tratamentu trempan, bo por evitá ku nan ta pega otro hende (sin ku nan sa). Pa logra esaki ta importante pa fasilitá e proseso moda ku hende por laga tèst nan mes mas lihé i ku mas frekuensia. E soño di Athalia ta pa tur hende papia habrí i normal riba e tópiko. “Si bo mira kon fásil ta papia tokante relashon seksual, kuenta di chanchan ku pechu, lo bo no kere. Mi a sali ku tal i tal hende, i nos a hasi tal i tal kos. Pero puntra nan tokante HIV i nan ta dal sera. Lo ta bon si hende por papia tokante HIV mes fásil ku tokante…”

94 weergaven0 opmerkingen

Recente blogposts

Alles weergeven

Comments


bottom of page