top of page

Proyekto Kòrsou; Interview Stephanie Gumbs

“Kombatí stigmatisashon i brinda personanan ku HIV yudansa finansiero pa nan por bai buska nan remedinan na hòspital”. Investigador Stephanie Gumbs (28) sa kon importante esei ta. “E stigma na Kòrsou ainda ta enorme”.


“Ku 17 aña mi a bai Hulanda pa studia siensia biomédiko. Despues di a kaba ku mi estudio di Maestría, mi a speshalisá den malesanan infeksioso i imunidat. Esei semper tabata e temanan ku mi tabata mas interesá den dje. Awor mi ta kabando ku mi investigashon doktoral titulá ‘Cerebrale organoids’, o sea ‘Serebro artifisial’. Un estudio inovador, ku Fundashon Plòns a finansiá kompletamente.”

Serebro artifisial “Pa por a investigá HIV den serebro, nos tabatin mester di un modelo di prueba. Bo no por simplemente kana yega serka un hende ku HIV i pidi’é pa un pida di su serebro. En bes di esaki nos a uza sèl di kueru pa krea ‘stamcel’, i dje sèlnan aki despues nos a krea sèl di serebro. E sèlnan ei ta krese forma un klòntji basta paresido na un serebro di bèrdat. Meta di mi investigashon di promoshon tabata pa demonstrá ku nos por uza e modelo artifisial akí pa haña un mihó bista riba HIV den serebro. Nos a logra e meta ei. Mi ta orguyoso di por a kontribuí na esei”.

Hiv na Kòrsou “Pa aña, mas o ménos 50 kaso nobo di HIV ta bini aserka na Kòrsou. E kantidat ei no ta bahando manera sí nos ta mira ta pasa na Hulanda. E problema ta ku hopi hende ta bai dòkter muchu lat. Nan tin Aids kaba e ora ei. Esei ta pasa, pasobra ainda tin hopi stigma. Hopi hende no ta tribi di hasi tèst. Kurioso ta sinembargo ku den kaso di Covid sí esaki tabata hopi diferente. Si lo bo a bisa ku bo ta bai tèst bo mes pa Covid, hende tabata haña esei hopi responsabel di bo. Pero si bo bisa ku bo ta bai tèst pa HIV, nan ta kla pa bisa ku ta kos di iresponsabel lo bo ta kana hasi riba kaya. Mester bini kambio den esei. Si bo laga tèst bo mes pa HIV, bo ta hustamente hopi responsabel si bo kier protehá bo mes i hende ku bo ta tene relashon kuné”

Mihó kuido Pa por kombatí e stigmatisashon akí i pues e epidemia, ta importante pa kontribuí finansieramente na e proyekto di HIV aki na Kòrsou. Hende ku HIV, aworaki ta solamente na e botika di hòspital nan por akudí pa buska nan remedinan. Anto asta e ora ei, ta pa UN luna so nan ta haña bai kuné. Pa hopi di e hendenan akí, ta hopi difísil pa nan por yega te na hòspital. Pero si nos por drecha e kuido di manera ku nan por haña nan remedinan na botikanan mas serka di nan kas, esaki lo stimulá nan pa keda uza nan remedinan. Asina nan lo por biba mas salú, i nan lo no sigui transmití e viro. Na mes momento e ta eliminá e stigmatisashon. Esakinan ta kos ku lo por implementá mesora. No mester di aña largu di investigashon den laboratorio pa realisá esaki. Pero mester di medionan finansiero si.”

E resultadonan final di e estudio inovativo riba serebro artifisial lo sigui mas lat durante e aña akí. Bo ta yuda nos hasi e proyekto aktual tambe mesun eksitoso?

246 weergaven0 opmerkingen
bottom of page