Por evitá infekshon ku HIV?
Evitá infekshon ku HIV.
Evitá kompletamente no por, pero bo por minimalisá e riesgo pa haña virus na 4 manera:
-
Hasi seks na un manera sigur
-
Laga kontrolá bo mes regularmente pa HIV i otro enfermedat seksualmente transmití.
-
PrEP
-
PEP
4 maneranan.
Hasi seks na un manera sigur
-
usa kondon ora di sèks vaginal i anal.
-
Limpia huguete seksual òf kambia e kondon ora bo kaba di us’é riba un partner diferente.
Tene na kuenta ku HIV ta un malesa skondí: bo no por detektá esaki serka bo mes òf un otro persona. Esaki ta konta tambe pa sierto otro enfermedat seksualmente transmití. Úniko manera pa detektá ta dor di hasi tèst di sanger. Si bo tin un di e enfermedatnan ku ta keda seksualmente transmití, úniko manera pa sa ta dor di kontrolá. Ademas, si bo tin un di nan bo ta mas suseptibel pa otro malesa tambe. Hende ku no haña tratamentu pa un malesa ku e no sa di dje, fásilmente por pega mas hende.
Laga kontrolá bo mes regularmente pa HIV i otro enfermedat seksualmente transmití.
Ta kalkulá ku tin mas o menos 1000 persona ku HIV ta biba na Kòrsou.
E úniko manera pa sa si bo tin HIV of no, ta dor di laga kontrolá bo mes regularmente. Esei por serka bo dokter di kas, of na un di e organisashonnan menshoná mas abou.
PrEP
Esaki ta un píldora ku por prevení ku bo ta haña HIV ku bo por tuma promé ku bo tene relashon seksual. Prep ta sigur i efikas. Esaki a keda sientífikamente pruebá. E ta optenibel for di 2012 na Estados Unidos i for di 2016 tambe na Fransia i Norwega. Si bo ke sa kon bo por yega na PrEP aki na Kòrsou, tuma kontakto ku nos libremente.
PEP
Pep ta un píldora ku bo ta tuma despues di a tene relashon seksual. E ta un tipo di "Morning After Pill". Bo ta us’é ora e riesgo seksual ku bo a tuma ta grandi. E ta optenibel solamente via GGD òf departamentu di Poli na hòspital. E ta un tratamentu ku ta dura un par di siman i e tin hopi efekto sekundario.