Bida ku HIV.
Bida ku HIV.
E speransa di bida pa personanan kontagiá ku e vírùs mas i mas ta aserka espektativanan pa bida largu di personanan ku no tin HIV. Si bo ta bou di tratamentu i bo ta generalmente saludabel bo por funshoná normal den sosiedat.
HIV stigma.
Na momentu ku bo haña sa ku bo tin HIV, naturalmente bo tin ku kustumbrá ku e idea i hopi kos ta pasa den bo mente. HIV ainda ta un tópiko pisá dennos komunidat. Esaki ta bini dor di e stigma ku tin riba personanan ku HIV.
Hopi hende tin miedu, pero ora bo kustumbrá ku e idea i ta mas mihó informá lo bo ta mas trankil i bo no lo laga HIV dominá bo bida mas. Bo ta siña biba ku e malesa.
Pregunta importante.
Bo por haña yiu si bo tin HIV?
Bo por traha / haña yu si bo ta HIV positivo. E yu no nesesariamente mester nase ku HIV. Si bo ta risibí tratamentu, bo no por pasa e vírùs pa bo partner ni e yu. Un vírùs suprimí dor di remedi ta bira indetektabel pues no transmisíbel dor di kontakto seksual. Un hende muhe ku ta bou di tratamentu i ta sigui esaki manera mester, tin e vírùs suprimí i por sali na estado i duna lus normal. E chèns ku e bebi tambe ta haña e vírùs ta kasi nihil.
Bo por kura di HIV?
Bo no por "kura" di HIV. E vírùs no ta sali for di bo kurpa. Remedinan por evitá ku bo ta bira malu. Sinembargo tin algun kaso konosí di personanan ku leukemia ku a haña un transplante di "medula osea" (beenmerg) ku si a kura, pero esaki no ta algu usual i típiko pa tur hende.
HIV ta solamente pa hende homber homoseksual?
Tur hende ku hasi sèks sin protekshon tin chèns pa kontraé HIV. No ta importá bo preferensia seksual. Mayoria kaso ta bin di relashon seksual sin protekshon i di transmishon di mama pa yu. P'esei na hopi pais, inkluso Kòrsou, ta tèst tur hende muhé na estado pa presensia di HIV den nan sanger.
Na paisnan kaminda tin hopi uso di droga via angua tambe sa tin kaso di transmishon di HIV. Esaki sinembargo no ta e kaso na Kòrsou.
Dunadónan di sanger (Bloedbank) pa hopi tempu kaba ta wòrdu di tèst pa HIV, pero ántes esei no tabata e kaso, di manera ku pa un temporada hopi kòrtiku hende a wòrdu kontagiá ku e vírùs di e forma aki.