Fundashon Plòns Kòrsou ta un plataforma ku tin komo meta pa konsientisá i eduká riba e topiko di HIV/Aids aki na Kòrsou. Nos ta traha plannan konkreto i ehekutá nan. Tambe nos ta bini ku solushon i ofresé sosten pa asina berdaderamente hasi un diferensia den komunidat. Tur esaki den koperashon ku otro organisashonnan. 

 

17 di yüli 2020, un dia spesial… Loke a kuminsá komo un inisiativa pa atendé e problemátika di HIV/Aids riba nos isla, a resultá den inisio di Fundashon Plòns Kòrsou i Fundashon Kennisstichting Plòns Kòrsou.

 

Direktiva di Fundashon Plòns Kòrsou ta para responsabel un bon organisashon di e fundashon. Pero e nesesidat pa forma un grupo ku ta dediká su mes na konosementu i e aspekto médiko di e problemátika i ku ta pará mas serka di e pashèntnan, ta grandi. Pa e motibu aki a lanta Fundashon Kennisstichting Plòns Kòrsou. 

​

Tin hopi reto, manera por ehèmpel e presentashon di e fundashonnan aki, den un sosiedat kaminda tin vários organisashon konosí ku ta atendé e problemátika di HIV-Aids. Pero tambe retonan manera duna kontenido na proyektonan i finansamentu den un tempu ekonómikamente difísil. 

 

Pa kolmo nos tin COVID tambe, un otro vírùs ku ta pone hopi preshon riba kuido i konsekuentemente e kuido pa pashèntnan di HIV-Aids. Un malesa ku a kambia tambe e maneranan ku nos ta reuní, organisá simposio, konferensia, kòmbersashonnan personal kompletamente i ku awor mester tuma lugá na un distansia físiko, pero tòg logra nos metanan. E importansia di komunikashon digital ta evidente, awor i den futuro. 

 

Fundashon Plòns Kòrsou ke inisiá kòmbersashon riba e tópiko di HIV/Aids na Kòrsou pa asina por kombatí stigmatisashón i diskriminashon. Pa perkurá pa komunidat tin akseso na informashon, ta konsiente di e medidanan di prekoushon i bira konsiente di e nesesidat pa risibí  tratamentu nesesario. Esaki ta kuminsá ku informá tur hende korektamente a base di echo. Ta nesesario pa hasi nos hobennan konsiente di e importansia pa ta bon informá tokante HIV-Aids.