Fundashon nobo Plòns Kòrsou ta lansa kòmberSA.

WILLEMSTAD - Fundashon Plòns Kòrsou ta un plataforma ku ke fasilitá kòmbersashon tokante HIV i Aids na Kòrsou pa kombatí stigmatisashon i diskriminashon. P’esei nan ta lansa nan kampaña titulá KòmberSA, pa repartí informashon korekto tokante e último desaroyonan. Esaki entre otro pa medio di nan website fundashonplons.com.

Hopi hende tin miedu dor di falta di informashon pero nan no ta buska pa sa pasobra e tema ta tabú. Esaki ta kousa yùist mas daño. Kontagio pa kabes ta 6x mas haltu na Kòrsou ku na Hulanda. I Karibe ta konosí komo e region ku e persentahe di kontagio mas haltu na mundu.

E direktiva di Fundashon Plòns Kòrsou; Harley Offerman, Sergio (Boy) Bakmeijer, Sharvelo Felomina, Tahis Winklaar i Etienne Meyer.

Mester kombersá, pero sí basá riba echo pa sòru pa komunidat tuma e medidanan di prekoushon na pechu i laga kontrolá i ser tratá na e manera korekto. Ta nesesario pa involukrá hubentut i mustra nan riba importansia di informashon tokante HIV-Aids. I sektor di enseñansa tambe mester ta mas enbolbí den esaki.

Fundashon Plòns tin komo meta konsientisashon tokante HIV i Aids. E fundashon kier traha plannan konkreto i efektuá nan pa trese kambio, i pa bini ku solushonnan apropiá i ofresé respaldo pa di e manera ei hasi un diferensha.

E tempu ta ekonómikamente difisil, anto pa kolmo ku e viro di COVID a pone kuido pa pashèntnan di HIV-Aids bou di preshon. E importansha di komunikashon digital awor i den futuro ta evidente.

Tambe a mira nesesidat pa forma un sentro di konosementu vinkulá na e fundashon, ku ta pará mas serka di e pashèntnan i ta dediká su mes na wak e aspekto médiko. P’esei a lanta Fundashon Kennisstichting Plòns Kòrsou.

Fundashon Plòns Kòrsou ta traha den estrecho koperashon ku varios otro organisashon ku tambe ta komprometé nan mes na e kousa di kombatí HIV-Aids, entre otro Famia Plania, Curaplus, Salú pa tur, stichting DaSH i Sèks i kuido. Tur persona i instansia ta bon biní i por tuma kontakto ku e fundashon na fundashonplons.com. Tambe ta pidi tur hende ku ke hasi un donashon mensual òf den un tiru pa tuma kontakto via nan website.

Miembronan di e direktiva di Kennisstiching Plòns Kòrsou; Athalia Cicilia Alberto, Diederik van de Wetering i Esther Rooijakkers.